Norse · Anglo-Saxon Poetry · 53 of 343
Riddle 12
Old English originals (Anglo-Saxon Poetic Records)
✦
Fotum ic fere, foldan slite, grene wongas, þenden ic gæst bere. Gif me feorh losað, fæste binde swearte Wealas, hwilum sellan men. Hwilum ic deorum drincan selle beorne of bosme, hwilum mec bryd triedeð felawlonc fotum, hwilum feorran broht wonfeax Wale wegeð ond þyð, dol druncmennen deorcum nihtum, wæteð in wætre, wyrmeð hwilum fægre to fyre; me on fæðme sticaþ hygegalan hond, hwyrfeð geneahhe, swifeð me geond sweartne. Saga hwæt ic hatte, þe ic lifgende lond reafige
ond æfter deaþe dryhtum þeowige.