Riddle 54

Hyse cwom gangan, þær he hie wisse stondan in wincsele, stop feorran to, hror hægstealdmon, hof his agen hrægl hondum up, hrand under gyrdels hyre stondendre stiþes nathwæt, worhte his willan; wagedan buta. þegn onnette, wæs þragum nyt tillic esne, teorode hwæþre æt stunda gehwam strong ær þon hio, werig þæs weorces. Hyre weaxan ongon under gyrdelse þæt oft gode men ferðþum freogað ond mid feo bicgað.