The Paris Psalter: Psalm 89

þu eart friðstol us fæste, drihten, of cynne on cynne and on cneorisse. ærðon munta gesceaft ofer middangeard oððe ymbhwyrft eorðan wære oþþe world wære, þu eart, wuldres god. Ne ahwyrf þu fram mænn heah eadmedu; and þu cuðlice cwæde sylfa: "Ic manna bearnum mod onwende." For þinum eagum, ece drihten, þusend wintra bið þon anlicast, swa geostran dæg gegan wære; And swa hi on niht hyrdnesse neode begangað, ne heora winterrim for wiht ne doð. Morgen gewiteð swa gemolsnad wyrt;

oðre morgene eft gebloweð and geefneð swa, oþþæt æfen cymeð, þonne forwisnað, weorðeð to duste. Forþon we on þinum yrre ealle forwurdon, wæron on þinum hathige hearde gedrefde. þu ure unriht eall asettest, þær þu sylfa to eagum locadest, and ure worulde þu eac gestaðelodest on alihtincge andwlitan þines. Forþam ðe ure dagas ealle geteorudun, and we on þinum yrre synt swiðe gewæhte. Wæran anlicast ure winter geongewifran, þonne hio geornast bið, þæt heo afære fleogan on nette;

beoð ure geardagas gnornscendende, þeah þe heora hundred seo samod ætgædere. Gif on mihtigum mannum geweorðeð, þæt hi hundehtatig ylda gebiden, ealle þe þær ofer beoð æfre getealde wintra on worulde, þa beoð gewinn and sar. Us manðwærnes becwom micel ofer ealle and we on þam gefean forhte gewurdan. Hwa ðæs soð me cann sæcgean ænig, hu þines yrres egsa standeð and seo micle miht? Nis þæt mann ænig þe þa ariman rihte cunne. Do us þa þine swiðran hand, drihten, cuðe, þam þe on snytrum syn swyðe getyde,

and þa heora heortan healdað clæne. Gehweorf us hwæthwiga, halig drihten; wes þinum scealcum wel eaðbede. We synd gefyllede fægere on mergenne þinre mildheortnesse; þæs we on mode nu habbað ealle dagas æþele blisse. We gefeoð swylce for þon fægerum dagum, on þam þu us to eadmedum ealle gebrohtest, and for ðam gearum þe we on gesawon yfela feala. Beseoh on þine scealcas swæsum eagum and on þin agen weorc, ece drihten, and heora bearn gerece bliðe mode. Wese us beorhtnes ofer bliðan drihtnes, ures þæs godan godes georne ofer ealle;

gerece ure handgeweorc heah ofer usic.