Zoroastrian · The Yashts · 17 of 20
Yasht 17: ASHI YASHT ("Hymn to Ashi")
tr. James Darmesteter, Sacred Books of the East vol. 23 (American Edition, 1898)
0. (pa nãm i ýazdã, hôrmezd i hvadâe i awazûnî gurz hvarahe awazâyât,
mainyô arshasañg bê rasât,
ezh hamâ gunâh ... pa patit hôm!)
xshnaothra ahurahe mazdå, tarôidîti angrahe mainyêush, haithyâvarshtãm hyat vasnâ ferashôtemem. staomî ashem,
ashem vohû...(3).
fravarâne mazdayasnô zarathushtrish vîdaêvô ahura-tkaêshô,
(Here recite the appropriate Gah dedication.)
ashôish vanghuyå cistôish vanghuyå erethê vanghuyå rasãstâtô vanghuyå hvarenanghô savanghô mazdadhâtahe
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!
1. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm,
2. dukhdharem ahurahe mazdå hvangharem ameshanãm speñtanãm ýâ vîspanãm saoshyañtãm frasha xrathwa frathañjayeiti uta-hê âsnem xratûm ava-baraiti vârema uta-hê âsnaêca zbayañtâi dûraêca zbayañtâi jasaiti avanghe, ýô ashîm ýazâite zaothrâbyô hô mithrem ýazâite zaothrâbyô.
3. ahe raya hvarenanghaca
tãm ýazâi surunvata ýasna
tãm ýazâi huyashta ýasna
ashîm vanguhîm zaothrâbyô, ashîm vanguhîm ýazamaide
haomayô gava baresmana hizvô danghangha mãthraca vacaca shyaothnaca zaothrâbyasca arshuxdhaêibyasca vâkhzhibyô.
ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide!
4. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
5. haomaheca nemô mãthraheca ashaonaêca zarathushtrahe,
atcit bâ nemô haomâi
ýat vîspe anye madhånghô
aêshma haciñte xrvidrvô
âat hô ýô haomahe madhô
asha hacaite hvaê-paithe.
6. ashish vanguhi ashi srîre ashi bânumaiti shâiti vyâvaiti bânubyô
ashi dâthre vohûm hvarenô
aêshãm narãm ýôi hacahi,
hubaoidhish baodhaite nmânem
ýenghe nmâne ashish vanguhi
sûra pâdha nidathaite
âgremaitish darekhâi haxedhrâi.
7. tê narô xshathra xshayeñte ash-baourva
nidhâtô-pitu hubaoidhi
ýahmya staretasca gâtush
anyåsca berexdhå avaretå
ýôi hacahi ashish vanguhi,
ushta bâ ýim hacahi
uta mãm upanghacahi
vouru-saredha amavaiti.
8. aêshãm nmânå hvidhâtå
gaosûrånghô hishteñte
ash-paourvå darekhô-upastêe
ýôi hacahi ashish vanguhi,
ushta bâ ýim hacahi
uta mãm upanghacahi
vouru-saredha amavaiti.
9. aêshãm gâtava hishteñte
hustareta hupô-busta
hukereta barezish-havañtô
zaranyapaxshta-pâdhånghô
ýôi hacahi ashish vanguhi, ushta bâ ýim hacahi uta mãm upanghacahi vouru-saredha amavaiti.
10. aêshãm vañtånghô bât mainyånghô
gâtush paiti ångheñti
ýôi srîra barezish-havañtô
merezyumnå añku-paêsemnå
frâ gaoshâvara sispimna
cathru-karana minuca zaranyô-pisi. kadha nô avi âjasât nmânô-paitish kadha shâiti paitishâm fryâ paiti tanvi
ýôi hacahi ashish vanguhi, ushta bâ ýim hacahi uta mãm upanghacahi vouru-saredha amavaiti.
11. aêshãm kaininô ångheñte
ãkhmô-paidhish urvizô-maidhyå
sraotanvô darekhô-añgushtå
kehrpa avavatãm sraya
ýatha didhayatãm zaoshô
ýôi hacahi ashish vanguhi, ushta bâ ýim hacahi uta mãm upanghacahi vouru-saredha amavaiti.
12. aêshãm aspånghô bayeñte
âsavô ravô-fraothemanô
raom vâshem vâshayañte
mrâtem carema thañjayeñte
taxmem staotârem vazeñti
âsu-aspem derezi-rathem
tizhi-arshtîm darekha-âreshtaêm
xshviwi-ishûm parô-kevîdhem
vîtârem paskât hamerethem
jañtârem parô dushmainyûm
ýôi hacahi ashish vanguhi, ushta bâ ýim hacahi uta mãm upanghacahi vouru-saredha amavaiti.
13. aêshãm ushtrånghô bayeñte
saêni-kaofa ash-manangha aojayeni zemat peretamna vadhairyavô
ýôi hacahi ashish vanguhi, ushta bâ ýim hacahi uta mãm upanghacahi vouru-saredha amavaiti.
14. aêshãm erezatem zaranim
niberethi âbereta baraiti
aiwitarâbyô haca danghubyô
vastråsca keshå bâmanivå
ýôi hacahi ashish vanguhi,
ushta bâ ýim hacahi
uta mãm upanghacahi
vouru-saredha amavaiti.
15. apa mãm apa-daidhya
frâ-mãm aiwi-urvaêsayanguha
marzhdikem ashish berezaiti,
hudhâta ahi hucithra
vasatha ahi xshayamna
tanuye hvarenanghe dâite.
16. pita-tê ýô ahurô mazdå
ýô mazishtô ýazatanãm
ýô vahishtô ýazatanãm,
mâta ârmaitish speñta
brâta tê ýô vanghush sraoshô ashyô
rashnushca berezô amavå
mithrasca vouru-gaoyaoitish ýô baêvare-spasanô hazangra-gaoshô hvangha daêna mâzdayesnish.
17. upa-staota ýazatanãm
amuyamna razishtanãm
paiti-stayata raithya
ashish vanguhi ýâ berezaiti
uiti vacêbish aojana,
kô ahi ýô mãm zbayehi
ýenghe azem frâyô zbayeñtãm
sraêshtem susruye vâcim.
18. adhât uiti fravashata,
ýô spitâmô zarathushtrô
ýô paoiryô mashyâkô
staota ashem ýat vahishtem
ýazata ahurem mazdãm
ýazata ameshê speñtê
ýenghe zãthaêca vaxshaêca
urvâsen âpô urvaråsca
ýenghe zãthaêca vaxshaêca
uxshin âpô urvaråsca,
19. ýehe zãthaêca vaxshaêca
apa-dvarat angrô mainyush
haca zemat ýat pathanayå
skarenayå dûraêpârayå,
uiti davata hô ýô duzhdå
angrô mainyush pouru-mahrkô,
nôit mãm vîspe ýazatånghô
anuseñtem fraoreciñta
âat mãm aêvô zarathushtrô
anuseñtem apayeiti,
20. jaiñti mãm ahuna vairya avavata snaithisha ýatha asma katô-maså, tâpayeiti mãm asha vahishta mãnayen ahe ýatha ayaoxshustem, raêkô mê haca anghå zemat vanghô kerenaoiti
ýô mãm aêvô jâmayeiti
ýô spitâmô zarathushtrô.
21. adhât uiti fravashata
ashish vanguhi ýâ berezaiti,
nazdyô mãm upa-hishta
erezvô ashâum spitama
upa mê srayanguha vâshahe,
nazdyô tãm upa-hishtat
ýô spitâmô zarathushtrô
upa hê srayata vâshahe.
22. â-dim usca pairi-marezat
hâvôya bâzvô dashinaca
dashina bâzvô hâvayaca
uiti vacêbish aojana,
srîrô ahi zarathushtra
hukeretô ahi spitama
hvascvô darekhô-bâzâush
dâtem tê tanuye hvarenô
urunaêca darekhem havanghem
ýatha imat ýat tê frâvaocim.
ahe raya ... tåscâ ýazamaide!
23. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
24. tãm ýazata
haoshyanghô paradhâtô
upa upabdi harayå berezô
srîrayå mazdadhâtayå.
25. âat hîm jaidhyat,
avat âyaptem dazdi-mê
ashish vanguhi ýâ berezaiti
ýat bavâni aiwi-vanyå
vîspe daêva mâzanya,
ýatha azem nôit tarshtô frânmâne
thwaêshât parô daêvaêibyô
frâ ahmât parô vîspe daêva
anusô tarshta nemåñte
tarshta temanghô dvaråñti.
26. pairi-tacat pairi-jasat
ashish vanguhi ýâ berezaiti, vîñdât tem ýânem haoshyanghô paradhâtô.
ahe raya ... tåscâ ýazamaide!
27. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
28. tãm ýazata
ýô ýimô xshaêtô hvãthwô
hukairyât haca barezanghat.
29. âat hîm jaidhyat,
avat âyaptem dazdi-mê
ashish vanguhi ýâ berezaiti
ýatha azem fshaoni vãthwa ava-barâni avi mazdå dâmabyô ýatha azem amerextîm avi-barâni avi mazdå dâmabyô,
30. uta azem apa-barâni va shudhemca tarshnemca haca mazdå dâmabyô uta azem apa-barâni va zaourvãmca merethyûmca haca mazdå dâmabyô uta azem apa-barâni va garememca vâtem aotemca haca mazdå dâmabyô hazangrem aiwi-gâmanãm.
31. pairi-tacat pairi-jasat
ashish vanguhi ýâ berezaiti, viñdât tem ýânem ýô ýimô xshaêtô hvãthwô.
ahe raya ... tåscâ ýazamaide!
32. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
33. tãm ýazata
vîsô puthrô âthwyânôish
vîsô sûrayå thraêtaonô
upa varenem cathru-gaoshem.
34. âat hîm jaidhyat,
avat âyaptem dazdi-mê
ashish vanguhi ýâ berezaiti
ýat bavâni aiwi-vanyå azhîm dahâkem thrizafanem thrikameredhem xshvash-ashîm hazangrâ-ýaoxshtîm ashaojanghem daêvîm drujem akhem gaêthâvyô drvañtem ýãm ashaojastemãm drujem fraca kereñtat angrô mainyush aoi ýãm astvaitîm gaêthãm mahrkâi ashahe gaêthanãm, uta-hê vañta azâni sanghavâci arenavâci ýôi hen kehrpa sraêshta zazâtêe gaêthyâi tê ýôi abdôteme.
35. pairi-tacat pairi-jasat
ashish vanguhi ýâ berezaiti, viñdât tem ýânem vîsô puthrô athwyânôish vîsô sûrayå thraêtaonô.
ahe raya ... tåscâ ýazamaide!
36. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
37. tãm ýazata
haomô frâshmish baêshazyô
srîrô xshathryô zairi-dôithrô
barezishte paiti barezahi
haraithyô paiti barezayå.
38. âat hîm jaidhyat,
avat âyaptem dazdi-mê
ashish vanguhi ýâ berezaiti
ýatha azem bañdayeni mairîm tûirîm frangrasyânem uta bastem vâdhayeni uta bastem upanayeni bastem kavôish haosravanghahe janât tem kava haosrava pasne varôish caêcastahe jafrahe uruyâpahe puthrô kaêna syâvarshânâi zûrô-jatahe narahe akhraêrathaheca naravahe.
39. pairi-tacat pairi-jasat
ashish vanguhi ýâ berezaiti, viñdât tem ýânem haomô frâshmish baêshazyô srîrô xshathryô zairi-dôithrô.
ahe raya ... tåscâ ýazamaide!
40. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
41. tãm ýazata
arsha airyanãm dah'yunãm
xshathrâi hañkeremô haosrava.
42. âat hîm jaidhyat,
avat âyaptem dazdi-mê
ashish vanguhi ýâ berezaiti
ýatha azem nijanâni mairîm tûirîm frangrasyânem pasne varôish caêcastahe jafrahe urvyâpahe puthrô kaêna syâvarshânâi zûrô-jatahe narahe akhraêrathaheca naravahe.
43. pairi-tacat pairi-jasat
ashish vanguhi ýâ berezaiti, viñdât tem ýânem arsha airyanãm dah'yunãm xshathrâi hañkeremô haosrava.
ahe raya ... tåscâ ýazamaide!
44. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
45. tãm ýazata ýô ashava zarathushtrô airyene vaêjahi vanghuyå dâityayå.
46. âat hîm jaidhyat,
avat âyaptem dazdi-mê
ashish vanguhi ýâ berezaiti
ýatha azem hâcayene vanguhîm âzâtãm hutaosãm anumatêe daênayâi anûxtêe daênayâi anu-varshtêe daênayâi ýâ-mê daênãm mâzdayasnîm zrasca dât apica aotât ýâ-mê varezânâi vanguhîm dât frasastîm.
47. pairi-tacat pairi-jasat
ashish vanguhi ýâ berezaiti, viñdât tem ýânem ýô ashava zarathushtrô.
ahe raya ... tåscâ ýazamaide!
48. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
49. tãm ýazata
berezaidhish kava vîshtâspô
pasne âpô dâityayå.
50. âat hîm jaidhyat,
avat âyaptem dazdi-mê
ashish vanguhi ýâ berezaiti
ýatha azâni peshana ashta aurvañtô vîspa-thaurvô ashtôish puthrô vîspa-thaurvô urvi-xaodhô urvi-verethrô stvî-manaothrish ýenghe hapta sata ushtranãm jainyâvarat pasca hvîdhahe, ýatha azâni peshana mairyehe h'yaonahe arejat-aspahe, ýatha azâni peshana darshinikahe daêvayasnahe.
51. uta azem nijanâni tãthryâvañtem duzhdaênem uta azem nijanâi spinjaurushem daêvayasnem, uta azem fraourvaêsayeni humaya varedhakanãmca h'yaonya haca dainghâvô, uta azem nijanâni h'yaonînãm dah'yunãm pañcasakhnâi satakhnâishca satakhnâi hazangrakhnâishca hazangrakhnâi baêvarekhnâishca baêvarekhnâi ahãxshtakhnâishca.
52. pairi-tacat pairi-jasat
ashish vanguhi ýâ berezaiti, viñdât tem ýânem berezaidhish kava vîshtâspô.
ahe raya ... tåscâ ýazamaide!
53. ashîm vanguhîm ýazamaide xshôithnîm berezaitîm huraodhãm huyazatãm hvanat-caxrãm amavaitîm dâtô-saokãm baêshazyãm perethvîrãm sûrãm.
54. âat aoxta ashish vanguhi ýâ berezaiti, mâ-cish mê ånghãm zaothranãm viñdita ýâ mâvôya nipârayeiñti mâ narô pairishtâ-xshudhrô mâ jahika para-daxshta mâ aperenâyu tauruna mâ kainina anupaêta mashyânãm.
55. ýat mãm tura pazdayañta
âsu-aspa naotaraca
âat azem tanûm aguze
adhairi pâdhem gêush arshnô baremâyaonahe
âat mãm fraguzayañta
ýôi aperenâyu tauruna
ýôi kainina anupaêta mashyânãm.
56. ýatcit mãm tura pazdayañta
âsu-aspa naotaraca
atcit azem tanûm aguze
adhairi maêshahe garô
ýat varshnôish satô-karahe
atcit mãm fraguzayañta
ýôi aperenâyu tauruna
ýôi kainina anupaêta mashyânãm
ýatcit mãm tura pazdayañta
âsu-aspaêm naotaraca.
57. paoiryãm gerezãm gerezaêta
ashish vanguhi ýâ berezaiti
haca aputhrô-zanyâi jahikayâi,
mâ hê avi pâdhem ava-hishta
mâ gâtûm nipaidhyanguha,
kutha hîsh azem kerenavâni
asmanem avi frashusâni
zãm avi ni-urvisyâni.
58. bityãm gerezãm gerezaêta
ashish vanguhi ýâ berezaiti
haca avanghâi jahikayâi
ýâ aom puthrem baraiti
anyahmâi arshânâi varshtem
paithe upa-baraiti,
kutha hîsh azem kerenavâni
asmanem avi frashusâni
zãm avi ni-urvisyâni.
59. thrityãm gerezãm gerezaêta
ashish vanguhi ýâ berezaiti,
imat mê stâvishtem shyaothnem
mashya vereziñti sâsta
ýat kainyô uzvâdhayeiñti
darekhem akhrvô nijâmayeiñti,
kutha hîsh azem kerenavâni
asmanem avi frashusâni
zãm avi ni-urvisyâni.
60. âat mraot ahurô mazdå,
ashi srîre dâmidhâite
mâ avi asmanem frashusa
mâ avi zãm ni-urvise
itha mê tûm hãm-caranguha
añtare aredhem nmânahe
srîrahe xshathrô-keretahe,
61. ana thwâ ýasna ýazâne
ana ýasna frâyazâne
ýase-thwâ ýazata vîshtâspô
pasne âpô dâityayå,
berezem barât zaota vâcim
hishtemnô pasca baresma,
ana thwâ ýasna ýazâne
ana ýasna frâyazâne
ashi srîre dâmidhâite
ahe raya ... tåscâ ýazamaide!
(Recite silently:)
62. (hôrmezd i hvadâe i awazûnî mardum mardum sardagã hamâ sardagã ham bâ ýasht i vahã vaem vahe dîn i mâzdayasnã âgâhî âstvãnî nêkî rasãnât êduñ bât,)
(Recite aloud:)
ýathâ ahû vairyô...(2).
ýasnemca vahmemca aojasca zavareca âfrînâmi
ashôish vanghuyå cistôish vanghuyå erethê vanghuyå rasãstâtô vanghuyå hvarenanghô savanghô mazdadhâtahe.
ashem vohû....
ahmâi raêshca ... hazangrem ... jasa-mê ... (kerba mazhd) ... ashem vohû...!!
* *
*