The Kentish Hymn

Wuton wuldrian weorada dryhten halgan hlioðorcwidum, hiofenrices weard, lufian liofwendum, lifes agend, and him simle sio sigefest wuldor uppe mid ænglum, and on eorðan sibb gumena gehwilcum goodes willan. We ðe heriað halgum stefnum and þe blætsiað, bilewit feder, and ðe þanciað, þioda walden, ðines weorðlican wuldordreames and ðinra miclan mægena gerena, ðe ðu, god dryhten, gastes mæhtum hafest on gewealdum hiofen and eorðan, an ece feder, ælmehtig god.

ðu eart cyninga cyningc cwicera gehwilces, ðu eart sigefest sunu and soð helend ofer ealle gesceft angla and manna. ðu, dryhten god, on dreamum wunast on ðære upplican æðelan ceastre, frea folca gehwæs, swa ðu æt fruman wære efeneadig bearn agenum fæder. ðu eart heofenlic lioht and ðæt halige lamb, ðe ðu manscilde middangeardes for þinre arfestnesse ealle towurpe, fiond geflæmdest, follc generedes, blode gebohtest bearn Israela, ða ðu ahofe ðurh ðæt halige triow ðinre ðrowunga ðriostre senna,

þæt ðu on hæahsetle heafena rices sitest sigehræmig on ða swiðran hand ðinum godfæder, gasta gemyndig. Mildsa nu, meahtig, manna cynne, and of leahtrum ales ðine ða liofan gesceft, and us hale gedo, heleða sceppend, niða nergend, for ðines naman are. ðu eart soðlice simle halig, and ðu eart ana æce dryhten, and ðu ana bist eallra dema cwucra ge deadra, Crist nergende, forðan ðu on ðrymme ricsast and on ðrinesse and on annesse, ealles waldend, hiofena heahcyninc, haliges gastes

fegere gefelled in fæder wuldre.