The Whale

Nu ic fitte gen ymb fisca cynn wille woðcræfte wordum cyþan þurh modgemynd bi þam miclan hwale. Se bið unwillum oft gemeted, frecne ond ferðgrim, fareðlacendum, niþþa gehwylcum; þam is noma cenned, fyrnstreama geflotan, Fastitocalon. Is þæs hiw gelic hreofum stane, swylce worie bi wædes ofre, sondbeorgum ymbseald, særyrica mæst, swa þæt wenaþ wægliþende þæt hy on ealond sum eagum wliten, ond þonne gehydað heahstefn scipu to þam unlonde oncyrrapum,

setlaþ sæmearas sundes æt ende, ond þonne in þæt eglond up gewitað collenferþe; ceolas stondað bi staþe fæste, streame biwunden. ðonne gewiciað werigferðe, faroðlacende, frecnes ne wenað, on þam ealonde æled weccað, heahfyr ælað; hæleþ beoþ on wynnum, reonigmode, ræste geliste. þonne gefeleð facnes cræftig þæt him þa ferend on fæste wuniaþ, wic weardiað wedres on luste, ðonne semninga on sealtne wæg mid þa noþe niþer gewiteþ

garsecges gæst, grund geseceð, ond þonne in deaðsele drence bifæsteð scipu mid scealcum. Swa bið scinna þeaw, deofla wise, þæt hi drohtende þurh dyrne meaht duguðe beswicað, ond on teosu tyhtaþ tilra dæda, wemað on willan, þæt hy wraþe secen, frofre to feondum, oþþæt hy fæste ðær æt þam wærlogan wic geceosað. þonne þæt gecnaweð of cwicsusle flah feond gemah, þætte fira gehwylc hæleþa cynnes on his hringe biþ fæste gefeged, he him feorgbona þurh sliþen searo siþþan weorþeð,

wloncum ond heanum, þe his willan her firenum fremmað, mid þam he færinga, heoloþhelme biþeaht, helle seceð, goda geasne, grundleasne wylm under mistglome, swa se micla hwæl, se þe bisenceð sæliþende eorlas ond yðmearas. He hafað oþre gecynd, wæterþisa wlonc, wrætlicran gien. þonne hine on holme hungor bysgað ond þone aglæcan ætes lysteþ, ðonne se mereweard muð ontyneð, wide weleras; cymeð wynsum stenc of his innoþe, þætte oþre þurh þone, sæfisca cynn, beswicen weorðaþ,

swimmað sundhwate þær se sweta stenc ut gewiteð. Hi þær in farað unware weorude, oþþæt se wida ceafl gefylled bið; þonne færinga ymbe þa herehuþe hlemmeð togædre grimme goman. Swa biþ gumena gehwam, se þe oftost his unwærlice on þas lænan tid lif bisceawað, læteð hine beswican þurh swetne stenc, leasne willan, þæt he biþ leahtrum fah wið wuldorcyning. Him se awyrgda ongean æfter hinsiþe helle ontyneð, þam þe leaslice lices wynne ofer ferhtgereaht fremedon on unræd.

þonne se fæcna in þam fæstenne gebroht hafað, bealwes cræftig, æt þam edwylme þa þe him on cleofiað, gyltum gehrodene, ond ær georne his in hira lifdagum larum hyrdon, þonne he þa grimman goman bihlemmeð æfter feorhcwale fæste togædre, helle hlinduru; nagon hwyrft ne swice, utsiþ æfre, þa þær in cumað, þon ma þe þa fiscas faraðlacende of þæs hwæles fenge hweorfan motan. Forþon is eallinga dryhtna dryhtne, ond a deoflum wiðsace wordum ond weorcum, þæt we wuldorcyning

geseon moton. Uton a sibbe to him on þas hwilnan tid hælu secan, þæt we mid swa leofne in lofe motan to widan feore wuldres neotan.