Waldere A

hyrde hyne georne: "Huru Welande... worc ne geswiceð monna ænigum ðara ðe Mimming can heardne gehealdan. Oft æt hilde gedreas swatfag and sweordwund secg æfter oðrum. ætlan ordwyga, ne læt ðin ellen nu gy... gedreosan to dæge, dryhtscipe is se dæg cumen þæt ðu scealt aninga oðer twega, lif forleosan oððe l... ...gne dom agan mid eldum, ælfheres sunu. Nalles ic ðe, wine min, wordum cide, ðy ic ðe gesawe æt ðam sweordplegan ðurh edwitscype æniges monnes

wig forbugan oððe on weal fleon, lice beorgan, ðeah þe laðra fela ðinne byrnhomon billum heowun, ac ðu symle furðor feohtan sohtest, mæl ofer mearce; ðy ic ðe metod ondred, þæt ðu to fyrenlice feohtan sohtest æt ðam ætstealle oðres monnes, wigrædenne. Weorða ðe selfne godum dædum, ðenden ðin god recce. Ne murn ðu for ði mece; ðe wearð maðma cyst gifeðe to geoce, mid ðy ðu Guðhere scealt beot forbigan, ðæs ðe he ðas beaduwe ongan ...d unryhte ærest secan. Forsoc he ðam swurde and ðam syncfatum,

beaga mænigo, nu sceal bega leas hworfan from ðisse hilde, hlafurd secan ealdne ᛟ oððe her ær swefan, gif he ða"